نئی دہلی،12/جنوری(ایس او نیوز/ایجنسی) شہریت ترمیمی قانون (سی اے اے) کوگرچہ مودی حکومت نے بہت جلدی میں نافذکردیاہے لیکن اس کے خلاف ملک بھر میں چل رہے احتجاج کے درمیان 106 سابق افسرشاہوں (بیوروکریٹس) نے حکومت کو خط لکھ کر اس قانون پر سوال اٹھائے ہیں۔ خط میں اس قانون کی صداقت پر سوال اٹھاتے ہوئے واضح طور پر کہا گیا ہے کہ نیشنل پاپولیشن رجسٹر (این پی آر)، شہریت ترمیمی قانون (سی اے اے) اور قومی شہریت رجسٹر (این آر سی) کی ملک کو کوئی ضرورت نہیں ہے اور یہ ایک بیکار مشق ہے۔ نیز، ان قوانین سے لوگ پریشان ہوں گے۔حکومت کو خط لکھنے والے ان سابق 106 افسرشاہوں میں دہلی کے سابق لیفٹیننٹ گورنر نجیب جنگ، سابق کابینہ سکریٹری کے ایم چندرشیکھر اور سابق چیف انفارمیشن کمشنر وجاہت حبیب اللہ شامل ہیں۔حکومت کو لکھے گئے خط میں گزارش کی گئی ہے کہ وہ قومی شناختی کارڈ سے متعلق شہریت قانون 1955 کی متعلقہ دفعات کو منسوخ کرے۔ سی اے اے، این پی آر، این آر سی کی ضرورت نہیں‘۔ خط میں لکھا گیا ہے کہ ”ہمیں سی اے اے کے التزامات کے آئینی جواز پر شدید اعتراض ہے اور ہم اس کی اخلاقی طور پر تائید نہیں کر سکتے۔ ہم واضح طور پر کہنا چاہتے ہیں کہ یہ قانون ہندوستان کی آبادی کے ایک بڑے حصے کے خدشات کو پیدا کرے گا یہ قانون دانستہ طور پر مسلم مذہب کو اپنے دائرے سے خارج کرتا ہے۔“خط میں مزید کہا گیا ہے کہ حالیہ دنوں میں مسلم طبقہ کو ان ریاستوں میں پولیس کارروائی کا سامنا کرنا پڑا جہاں حکمران جماعت کا کنٹرول ہے۔ اس سے وسیع پیمانے پر پائے جانے والے ان خدشات کو تقویت ملتی ہے کہ این پی آر- این آرسی کی مشق کا استعمال مخصوص طبقہ اور افراد کو نشانہ بنانے کے لئے ہو سکتا ہے۔خط میں سابق افسران نے غیر ملکی شہری (ٹریبونلز) ترمیمی آرڈر، 2019 کے تحت غیر ملکی سول ٹریبونل اور حراستی کیمپ کے وسیع پیمانے پر قیام پر بھی سوال اٹھائے ہیں۔ قابل ذکر ہے کہ سی اے اے کے حوالے سے پورے ملک میں مظاہرے ہو رہے ہیں اور کئی ریاستوں میں مظاہروں کے دوران بھڑکے تشدد کی زد میں آکر متعدد افراد اپنی جان گنوا چکے ہیں۔